Цэнтральная тэлевізія КНДР паказала кіраўніка дзяржавы каля трунаў, накрытых дзяржаўным сьцягам, паведамляе паўднёвакарэйскае агенцтва «Ёнхап».
Здымкі зробленыя ў час сумеснага культурнага мерапрыемства, арганізаванага Паўночнай Карэяй і Расеяй у Пхэньяне ў нядзелю. Вечарына была прысьвечаная першай гадавіне падпісаньня Дамовы аб усеабдымным стратэгічным партнэрстве паміж гэтымі дзяржавамі.
Таксама ў матэрыяле паказалі нататнік з плямамі крыві, які, як мяркуецца, належыць паўночнакарэйскаму салдату. Нататнік нібыта знайшлі на месцы бітвы ў Курскай вобласьці Расеі.
Дзяржаўныя СМІ Паўночнай Карэі таксама неаднаразова трансьлявалі выступ міністра культуры Расеі Вольгі Любімавай, якая была на падзеі і выцірала сьлёзы, як і некалькі іншых гледачоў.
Рэпартаж у паўночнакарэйскай тэлевізіі паказалі пасьля таго, як Расея і КНДР назвалі апэрацыю ў Курскай вобласьці «пасьпяховай».
28 красавіка КНДР афіцыйна пацьвердзіла ўдзел сваіх вайсковых падразьдзелаў у баявых дзеяньнях супраць украінскіх вайскоўцаў на тэрыторыі Курскай вобласьці Расеі. Паўночнакарэйскі лідэр Кім Чэн Ын загадаў паставіць у Пхэньяне помнік у гонар паўночнакарэйскіх вайскоўцаў — удзельнікаў вайны на баку Расеі.
28 красавіка Ўладзімір Пуцін падзякаваў салдатам КНДР за ўдзел у вайне супраць Украіны. Пуцін адзначыў, што войскі спэцыяльнага прызначэньня КНДР удзельнічалі ў баях у Курскай вобласьці на падставе Дамовы аб усеабдымным стратэгічным партнэрстве паміж Расеяй і КНДР ад 19 чэрвеня 2024 году, артыкул 4 якой прадугледжвае неадкладнае аказаньне вайсковай дапамогі пры ўзброеным нападзе на адзін з бакоў.
Форум